საქართველოს უზენაესი სასამართლოს საერთაშორისო პრაქტიკის შესწავლისა და განზოგადების განყოფილების ფარგლებში განახლდა კრებული „ ადამიანის უფლებათა ევროპული სასამართლოს გადაწყვეტილებები ქალთა მიმართ ძალადობისა და ოჯახში ძალადობის საკითხებზე’’. წარმოდგენილ კრებულში შესულ საქმეებს დაემატა სტრასბურგის სასამართლოს მიერ 2016-2017 წლებში მიღებული გადაწყვეტილებები.
ყოველგვარი ძალადობა, განსაკუთრებით კი ქალთა მიმართ ძალადობა და ოჯახში ძალადობა ყოველთვის იწვევს საზოგადოების უარყოფით რეაქციას და სახელმწიფოს მხრიდან საჭირო ხდება დაუყოვნებელი მკაცრი რეაგირება ამგვარ ფაქტებზე. სწორედ ამიტომ, სახელმწიფო სისტემატიურად ქმნის ახალ მექანიზმებს და აუმჯობესებს კანონმდებლობას, რომელიც კიდევ უფრო მეტად ხელს შეუწყობს მსხვერპლთა/დაზარალებულთა დაცვას, დახმარებასა და რეაბილიტაციას. სასამართლოს როლი განსაკუთრებით ფასდაუდებელია ქალთა მიმართ ძალადობის აღმოფხვრის საქმეში.
წინამდებარე კრებულის მიზანია მკითხველს გააცნოს იმ საქმეთა მოკლე შინაარსი და ადამიანის უფლებათა ევროპული სასამართლოს გადაწყვეტილებები, რომლებიც პრეს-რელიზების სახით მომზადებულია სტრასბურგის სასამართლოს მიერ.
კრებულში შესული ადამიანის უფლებათა ევროპული სასამართლოს საქმეები დააინტერესებთ მოსამართლეებს, ადვოკატებს, პროკურორებს, ფართო პროფილის იურისტებს, უმაღლესი სასწავლებლების იურიდიული ფაკულტეტების სტუდენტებსა და პროფესორ-მასწავლებლებს. კრებულში მოყვანილი საქმეები ასევე საინტერესო იქნება ადამიანის უფლებათა საკითხებით დაინტერესებული პირებისთვის.
იხილეთ კრებული
